АНУ-ын Номхон Далайн Эдийн Засгийн Хамтын Ажиллагааны Хорооны (АНУПЕКК) Удирдах Зөвлөл бөгөөд Колумбын Их Сургуулийн доктор, профессор Хью Патриктай уулзалт семинар 2008 оны 6 сарын 6-ны өдөр Гадаад Хэргийн Яамны “Итгэмжит” олон улсын хурлын танхимд болж өнгөрлөө. Номхон Далайн Эдийн Засгийн Хамтын Ажиллагааны Монголын Үндэсний Хорооны (МОНПЕКК) Ерөнхий Нарийн Бичгийн Дарга Д.Жаргалсайхан үг хэлж семинарыг нээв. Мөн МОНПЕКК-ийн Удирдах Зөвлөлийн гишүүн, МУИС-ийн ЭЗС-ийн захирал доктор Ч.Хашчулуун Монгол Улсын эдийн засгийн сэдвээр, ГХЯ-ны Хэвлэл, мэдээллийн хэлтсийн дарга Ж.Сэрээжав “Монголын Азийн бодлого” сэдвээр тус тус илтгэл тавилаа.

ПЕКК-ээс улирал бүр гаргадаг Бүсийн Төлөв Байдал тайлангийн 2008 оны эхний улирлын тайлан 05 сарын 31 нд гарлаа. Энэхүү тайланд ПЕКК-ийн гишүүн орнуудын эдийн засагч нарын тоймоос гадна Номхон далайн бүсэд хамааралтай мэдээлэл, дүн шинжилгээ мөн орсон байдаг. Энэхүү тайланд тухайн цаг үеийн Номхон далайн эдийн засгийн байдлыг тусгаснаас гадна ирэх жилийн тус бүс нутгийн эдийн засагт хийсэн прогнозыг мөн оруудсан байдаг.

Тайланг татаж авах: Бүсийн Байдал Тайлан, Хэвлэлийн Мэдээ

Японы Осака хотноо 2008 оны 3-р сарын 16-17-нд Ази-Номхон Далайн Эдийн Засгийн уулзазт (PEO Structure Specialists Meeting), 3-р сарын 18-19-нд эдийн засгийн прогнозын (PEO Forecasters/SOTR) уулзалтууд тус тус боллоо. Эдгээр уулзалтыг Японы ПЕКК-ийн Үндэсний Хороо зохион байгуулсан бөгөөд энэхүү уулзалтуудын хүрээнд жил бүр Номхон далайн бүсийн эдийн засгийн талаар тойм тайлан гаргаж ирэх онд эдийн засгийн байдал ямар байх талаар урьдчилан таамаг гаргадаг юм. Мөн тус бүсийн талаар бизнесийн бүлэг, засгийн газар, судлаачдаас санал асуулга явуулж эдийн засгийн хувьд ирэх жилийн хамгийн тулгамдсан асуудлыг тодорхойлдог юм.
МОНПЕКК-ийг төлөөлж Судалгааны Зөвлөлийн гишүүн Загдрагчаагийн Батболд оролцож илтгэл тавин оролцлоо. 3-р сарын 16-ны өдрийн 2-р үеийн Хятад, Монголын талаар болсон хуралдаанд “External Adjustments under Increasing Integration - Mongolia – Country Paper” сэдвээр илтгэл тавив. Оролцогчдын зүгээс Хятадын асуудалд ихээхэн анхаарал хандуулж байлаа. Японы эрдэмтэн Такаши Ошиү илтгэлд хэлэлцүүлгийг хийж, Монгол байгалийн баялгаас хэт хамааралтай эдийн засаг тул үүнийгээ төрөлжүүлэх талаар ямар арга хэмжээ авч байгааг сонирхож байлаа.


During the PEO conference, Осака, Япон улс

ПЕКК-ийн олон улсын “Ази-Номхон Далайн орнуудын Хүн ам зүйн өөрчлөлт ба Олон улсын ажиллах хүчний шилжилт: Бизнес ба Хамтын ажиллагаа” хурал 2008 оны 3 сарын 25-26 өдрүүдэд Сеүл хотноо зохион байгуулагдлаа.

Тус хуралд ПЕКК, АБАК, КОПЕК, Олон улсын хөдөлмөрийн байгууллага (ОУХБ), Олон улсын шилжих хөдөлгөөний байгууллага (ОУШХБ) болон олон улсын байгууллагуудын төлөөлөл, 21 улс орны гадаад харилцааны асуудал хариуцсан яам, агентлаг, элчин сайдын яамны төлөөлөгчид, судалгаа, шинжилгээний байгууллага, бизнесийн бүлгийн төлөөлөгчид оролцсон.

Монголын Үндэсний Телевизийн Дэлхийн улс төр нэтврүүлгийн 2008 оны 2 сарын 3-ны ээлжит дугаарт Ази-Номхон далайн бүсийн эдийн засгийн интеграци, Монголын оролцоо, боломжуудын талаар ярилцаж санал бодлоо хуваалцлаа. Оролцогчид Гадаад Хэргийн Яамны Бодлого Төлөвлөлт, Мэдээлэл, Үнэлгээний Газрын дэд захирал, Шинжлэх ухааны доктор Г. Төмөрчулуун, МОНПЕКК-ийн Ерөнхий нарийн бичгийн дарга Д. Жаргалсайхан, МОНПЕКК-ийн Судалгааны Зөвлөлийн гишүүн Д. Байлыхүү нар оролцлоо. Оролцогчид Ази-Номхон далайн эдийн засгийн интеграцид идэвхтэй оролцсоноор Монгол улсад хэрхэн ашиг тусаа өгөх, мэдлэгийн эдийн засгийг ашиглаж хэрхэн бүсийн эдийн засгийн харилцаанд оролцох, Монгол улсын засаглал, нээлттэй байдлыг сайжруулах, болон бусад сэдвээр нээлттэй ярилцсан.